Today Special - චිකන් බිරියානි

 චිකන් බිරියානි

ලේසියෙන්ම රසට චිකන් බිරියානි එකක් හදා ගන්න හැටි තමයි අද මයි කිචන් ෆේස්බුක් පිටුව ඔබට ඉදිරිපත් කරන්නේ.. උත්සව අවස්ථා වලදී හෝ නිවසේ සාමාන්‍ය කෑම වේලකට හෝ පහසුවෙන් ම හදා ගන්න පුළුවන් රෙසිපි එකක් තමයි මේ..

බිරියානි එකක් සැදීමේද දැන ගත යුතු ප්‍රධාන කරුනු 04ක් තියෙනවා..

1. හාල් වල තත්වය
2. බත හරියාකාරව පිස ගැනීම
3. චිකන් කරි එක පිලියෙල කර ගැනීම
4. හරියාකාරව බත කලවම් කර ගැනීම

බාස්මතී හෝ සූදුරු සම්බා වගේ හාල් වර්ගයක් ගන්නවා නම් ගොඩක් හොඳයි රසට වගේ හොඳ පෙනුමක් බිරියානි එකට ලබා ගන්න පුළුවන්.

ස්ටා අනීස්, බේලීෆ් සහ ගරම් මසාලා පවුඩර් වෙලඳපොලේ මිලදී ගන්න තියෙනවා.

මුලින්ම චිකන් එක මැරිනේට් කර ගමු.

අවශ්‍ය ද්‍රව්‍ය සහල් (500gකට)

කුකුල් මස් 250g
යෝගට් කෝප්ප බාගයක් (පැනි රස නැති)
ගම්මිරිස් කුඩු තේහැඳි 01
කහකුඩු තේහැඳි 1/2
ගරම් මසාලා පවුඩර් තේහැඳි 1/2
මිරිස් කුඩු තේහැඳි 01
කපා ගත් කොත්තමල්ලි කොල ටිකක්
බේලීෆ් 01
ස්ටාර් අනීස් 01
චොප් කර ගත් ලොකු ළුෑණු ගෙඩි 1/2
පෙති කපා බැද ගත් ලොකු ළුෑණු ගෙඩි 1/2
කොටු කපා ගත් තක්කාලි ගෙඩි 01
කපාගත් අමුමිරිස් කරල් 03
කුරුදු පොතු ස්වල්පයක්
කරඳමුංගු ඇට 04
කරාබු නැටි 03
ගම්මිරිස් ඇට තේහැඳි 1/2
රස අනුව ලුණු
බටර් හෝ ගී මේස හැඳි 01
එලවලු තෙල් මේස හැඳි 01

සාදන ක්‍රමය

කුකුල් මස් ටික සෝදා කපා ලුණු කුඩු, යෝගට්,මිරිස් කුඩු, කහකුඩු, ගරම් මසාලා පවුඩර් දමා කලවම් කර පැය දෙකක් තබන්න.

බාස්මතී සහල් ගන්නවා නම් සෝදා පැය බාගයක් පෙඟෙන්න තියන්න.

දැන් පෑන් එක ලිපේ තබා එලවලු තෙල් මේස හැඳි 01 දමා රත් වන විට බේලීෆ්, කරාබු නැටි, කුරුදුපොතු, කරඳමුංගු, ස්ටා අනීස් සහ
ගම්මිරිස් ඇට ටික දමා බැදෙන විට සහල් ටික දමන්න. දැන් උතුරන වතුර දමා බත 60%ක් වෙන තුරු පිස ගෙන වතුර පෙරා පැත්තකින් තියන්න.

දැන් ටිකක් ලොකු බාජනයක් ලිපේ තබා බටර් හෝ ගිතෙල් දමා රත් වන විට ඉඟුරු සුදුළුෑණු පේස්ට් එක දමා බැදෙනවිට කපා ගත් ලොකු ළුෑණු ගෙඩි බාගය දමා ටික වෙලාවකින් තක්කාලි සහ අමුමිරිස් ටික එකතු කරලා බැදෙන්න හරින්න. දැන් සීසන් වෙන්න තිබූ මස් එක එකතු කර කලවම් කර වතුර 50ml එකතු කරන්න. විනාඩි පහක් ගියාට පසු කපා ගත් කොත්තමල්ලි කොල ටික එකතු කරන්න. දැන් තම්බා ගත් සහල් ටික උඩින් අතුරන්න. ඊට උඩින් බැදපු ළුෑණු ටික අතුරන්න. කිරි 10mlකට කහපාට කලරින් ස්වල්පයක් එකතු කර බත් එක වටේට ඉස ගන්න. කලරින් කුඩු එකතු කරනවා නම් වතුර සමඟ කලවම් කර බාජනය අඩියට කුඩු මිදුන පසු වතුර ටික බතට ඉසින්න. දැන් පියන වසා හුමාලය පිට නොවෙන විදියට මද ගින්නෙ විනාඩි පහලොවක් පිස ගන්න. (මං නම් පෑන් එකේ පියන වටේට පාන් පිටි වලින් ඩෝ එකක් හදලා කවර් කලා. )

දැන් බිරියානි එක හොඳ සුවඳට තියෙනවා. චිකන් සමග බත් ටිකක් එන ලෙස බෝල් එකට බෙදා කැමති විදියට සරසා පිලිගන්වන්න.

උපුටා ගැනීම අන්තර්ජාලයෙන් 

Credit: Image Unsplash